三連陂(客語版)
在楊梅富岡老街往湖口方向个桃109縣道脣頭，有一座三隻陂塘串連共下个「三連陂」，三連陂最細个係圓陂有2公頃，呈現四方个角陂有4公頃，長陂最大，來到6公頃。陂塘係富岡个自然景觀，陂塘水圳係桃園地區最特別个地形地貌，早期因為農業灌溉需求來開墾囤水，除了農業功能之外，陂塘肚魚蝦提供了豐富个食物來源，變成餳著鳥仔尋食摎歇睏个最好環境，農業、陂塘摎自然生態，發生緊密共生个關係。位在三連陂中央个《粼粼波光、翩翩白影》作品，為許宗傑先生配合2018年桃園地景藝術節所創作，係一件巧妙運用自然風力，產生動能个動態雕塑，外觀用簡單个鐵材料造型做出白鶴優雅个線條，利用三連陂个自然風力翩翩起舞，動作就像白鶴企在水中央，優雅漫步低頭尋食。
富岡地區係臺地地形，《粼粼波光、翩翩白影》設置點黏等陂塘，脣頭地勢平緩，但是東北風當強，所以作品表面採用衖縫个設計，除了減少載重摎降低風力个威脅外，還做得分作品保有空間个穿透性，摎看起來會有較輕个感覺。高大个尺寸除了提供當好个欣賞條件外，也做得看出摎人體大細个差別，在畫面上產生巨大个視覺對比，也看得出人類个渺小，對自然萬物也應該愛有謙卑之心，坐飛行機愛下桃園機場該時，一定做得看著一窟又一窟个大細陂塘，這兜陂塘都係過去供應灌溉所用个水，也成就桃園成為千陂之鄉。