集義祠(客語版)
集義祠，地方講「萬善爺廟」，廟名最早係「萬善祠」，包尾在明治34年(1901年)登記為伯公岡集義祠。集義祠由地方人士徐景雲、曾茂麟、劉兆榮等人發起，建於清光緒17年(1891年)，到今已經有130零年歷史。早期係用泥土个建築，經過多擺个修繕，這下改建到非常派頭个廟觀，門口擁有高大雄偉个門樓，並用圍牆隔開廟地，擁有客家人皇帝稱呼个徐景雲大德，來到富岡後，發現當多無名屍骨，就捐地做為燥骨集中掩埋所用，安到「義塚」，後來清光緒17年(1891年)建廟，感懷先人來臺開墾个辛勞，主祀萬善爺。
集義祠早期單淨係由地方人士，將地方上四散、無人服侍个無名燥骨集中堆放，並來祭拜，消除災厄，祈求合境平安。這下廟中有一隻大神主牌，頂背刻「集義祠列列神位」，主祀萬善爺，並迎請新竹城隍廟个城隍爺、新竹枋寮褒忠亭个義民爺神位奉祀，陪祀福德正神。富岡地區中元祭典个活動高潮係「神豬比賽」摎「羊角比長」，「神豬比賽」盡多神豬有千斤以上，全部有弓靚靚个豬羊架仔，所有賞个牌匾會掛兩片，排在廟埕頭前，神豬比賽最鬧熱个時期，在歸條中正路頂差毋多全有豬羊；「羊角比長」个老山羊會戴等烏目鏡、嘴含菸筒頭，就像老紳士个打扮。這下受著社會風氣个影響，同時也會有「創意環保神豬」、「創意環保神羊」等不同方式，來表達敬謝之意。