妙靈宮(客語版)
早期伯公岡地區，自大井頭到火車頭个民眾，拜个伯公係過了火車路後，位在富豐里个老伯公廟；大井頭以下个豐野里、員本里這兜，拜个係妙靈宮个伯公，妙靈宮个位所在下陰影窩庄南方个溪脣碫仔就近，本來安到陰影窩大伯公，為當地重要个水頭伯公廟，始建於昭和12年(1937年)，到這下已經有百年歷史，最早个廟身係起在這下个野坑脣，民國59年(1970年)个風搓大水，廟身嚴重打壞忒，於民國63年(1974年)改建完成，建築還有包含一座當大个戲臺，也係一般伯公廟較少看著个，廟前个一對金獅，摎新竹縣新埔鎮義民廟个金獅盡相像，非常威武降人。
「妙靈宮」係楊梅地區最大个伯公廟，富岡在地人全講「大伯公」，逐年正月半(元宵節)、八月半(中秋節)，會做平安戲，正月半(元宵節)還會同時舉辦閹雞比賽，這戲臺安到「天倫臺」，就像係以前來看客家大戲，長輩渡等細人仔(孫仔孫女)自家帶長凳坐在這看戲，享受天倫之樂个意思。