大井頭伯公廟(客語版)
在去富岡火車頭个中正路摎信義街个相合位所，有一間「大井頭福德宮」，在民國69年（1980年）所興建个。「大井頭」位在富岡个中心位所，相合在中正路、信義街摎民生街，形成一隻廣場，因為早期路口有一口公用大井，提供民眾這兜取水用，所以正會安到大井頭。但是包尾家家戶戶都開始打井後，公用井就無早期个功能咧，這下大井頂高，已經有起一間伯公廟，就係「大井頭福德宮」，這口井安到「龍王井」。「龍王井」這下係在宮內供桌下背，傳說海龍王會由等井源，來探望伯公岡子民，就係人講个「龍王送水」。
有關龍王送水个故事，有一年，一個細人仔無小心跌到井肚，經過半點零鐘無浸死，有一股力量撐等細人仔浮在水面項，聽講有一個背鑊个後生人，佢非常恁會水，跳落井肚救人，利用井口轤轆个掛繩摎錫桶，摎細人仔救起來，自家正沿等繩仔爬出井來。
大井頭伯公廟，陪祀神係觀音娘摎媽祖婆，早期个富岡民眾，都會到富岡火車頭南片个細伯公廟拜，拜伯公一定愛行過火車路，但是因為鐵路電氣化，非常危險也毋方便，所以在民國69年(1980年)，新起「大井頭福德宮」，街路个民眾就開始全來這位拜。
有關大井頭伯公廟个香火來源講法有兩種，一種講法係，本來位在富岡火車頭南片个伯公，分香出來祭祀个。另外一種講法係，伯公毋願意徙出來，又因為已經決定在大井頭愛起新廟，正去新竹城隍廟，另外請轉來个伯公。