富岡火車站(客語版)
富岡舊名「伯公岡」，你若在大坡向東看，富岡這位係一座向往上个臺地，在山排摎田野間會看著不少个伯公廟。除這之外，火車頭就近也有一間香火當旺个伯公廟，再加上富岡地勢較高，就恁樣安到「伯公岡」，民國44年（1955年），伯公岡改名富岡，富岡本來係桃園市南片最尾一隻火車頭（這下係新富車頭），民國76年（1987年），原來老个日本式木造車頭主體拆忒，改建這下看著个紅毛泥淋个站房。
民國23年(1934年)設輕便鐵道停靠站，伯公岡街路肚有三隻輕便車停靠站，連結成Y字型路線，分別在這下个成功路摎信義街相合个伯公岡站，還過位在伯公岡火車頭前个停靠站；前者係接楊梅輕便路線个停靠站，後者係火車轉運貨物摎載客个停靠站，兩條路線將會在，街路肚第三停靠站—位在信義街摎中正路相合个大井頭匯集，並轉運到新屋。
富岡火車頭係細站，單淨停早期个普通車，這下係區間車，嗄擁有面闊最闊个鐵支路，分貨車車子停放，因為富岡係軍糧白米、軍馬个集散中心，乜係生活用石炭、工業用石炭个停靠站，脣頭个食品工廠進料摎出貨，也有火車路直達工廠肚。街區就近識有當多挨米礱間，車頭脣兩片大部分全係倉庫，創造了當時非常多个就業機會，火車頭脣个廣場，早期係鐵路員工宿舍，目前看著个大榕樹，就係早期鐵路員工所種。