老伯公祠(客語版)
富岡舊名「伯公岡」，佢个意思就係伯公祠个細臺地，位在楊梅區西北向个富岡臺地項，離四向个聚落，像係楊梅、新屋、湖口等地，全部相隔5到7公里个距離，摎新屋區係鄰舍，早期係算大坡區（這下个新屋大坡）个一部分。客家人用「伯公」來親暱稱呼土地伯公，可見伯公信仰在客家族群中，係幾重要又平常个信仰。
老伯公祠係石刻伯公，係當地最早个開莊伯公祠，摎富岡火車頭个南向正差150米，廟身原貌，闊差毋多2尺，高差毋多3尺，距離富岡火車頭後背火車路大約30米，早期富岡街路民眾擐等「三牲」摎供品，就可以直接在富岡火車頭前站，穿過火車路行到後站來祭拜，伯公廟後牆係走出來在拜亭外背，這下為著方便維護个原因，有在原廟身之外，另外加起屋頂摎面牆，形成「廟中廟」个特別景象，原廟身因為恁樣正做得保存下來，包尾因為富岡火車頭設立，民眾愛穿過火車路來拜伯公，有盡無利便，正會在富岡火車頭个北片，街路肚熱鬧个大井頭這位，起「大井頭福德祠」，自從大井頭伯公廟興建後，街路个人就較少來這拜咧，但是還係有較少數个人，行過火車路或者經過地下道捩過來拜。