永昌碾米廠(客語版)
永昌老礱間，在地又安到李珍樹挨米廠，在民國21年(1932年)落成。當時在伯公岡驛建立後，就近鄉鎮會將收成後个米穀，藉由輕便車或者牛車，運送到伯公岡所在个礱間做加工，再經由鐵道向外運輸，伯公岡黏時成為米穀集散地，供應北臺灣米穀需求，當時个伯公岡街區，當自然就變當多居民或者生理人，在這經商个鬧熱街市，一隻聚落就開始形成，全盛時期甚至有21間穀倉、摎6間礱間，可惜目前富岡，唯一保有舊式紅磚建物个，斯伸永昌老礱間 。
富岡因為車頭个設置，摎運輸利便个原因，早期車頭前設有當多「挨米廠」，客家人講「礱間」，日本時期，米穀、糖、鹽係運送轉日本本土个重要民生物資，建物大部分用紅瓦、紅磚起个，內部保有竹編泥牆、白灰粉个日本式風格，早年富岡火車頭係桃園个交通要衝，車頭就近礱間當多，楊梅、新屋、觀音个米穀，都會送來富岡加工、儲藏或者送去各地，同時還充作軍用糧倉，將白米送去日本。
民國34年(1945年)二次大戰期間，美軍偵查認定呂家聲洋樓係日本軍需个米糧中心，所以安排轟炸任務，永昌礱間頂高有七隻機關銃空，壁頂這下還做得看著當清楚，轟炸機來到該時，話著較高个礱穀機磚塔，係指揮塔，就用機關銃掃射測量愛擲炸彈个點，嗄意外擲在呂屋洋樓旁脣，火車頭前个民房，行到老礱間就像穿梭時光暗窿，見證農業時代个縮影。