富岡故事館(客語版)
桃園市楊梅區富岡街區个發展，在日本時代完成个縱貫鐵路，打破地理限制，分臺灣个貿易網絡產生革命性重整，鐵路沿線各車頭變成重要產物个集散地，物產个運銷深受鐵路運輸能力左右，摎四向就近个鄉鎮，像：新屋、大坡、望間、湖口等，形成在地貿易生活圈，在伯公岡驛建立後，就近鄉鎮會將收成後个米穀，藉由輕便車或者牛車，運到伯公岡所在个礱間做加工，再經由鐵道向外運輸，提供北臺灣米穀个需求，當時个伯公岡街路，當自然就變成，當多居民或者生理人，在這經商个鬧市街路，一隻聚落就開始形成。
鐵道倉庫个興建講述富岡个鐵道摎米个歷史，也係當時在地貨物，運輸到臺灣遠地个重要儲藏地，更加係脣頭地區，米穀輸出个重要區域，富岡因為設置輕便鐵道，提升地位，成為米穀集散地，該量時富岡火車頭脣頭礱間當多，全部摎米穀運送到這位加工、輸出，聽講全盛時期最多有到6間礱間，礱間脣个倉庫也大部分係米倉、肥料倉庫所使用，車頭就近設有楊梅農會摎新屋農會分部。
民國108年(2019年)，新富客家文化協會創立，同時，使用鐵道倉庫成立「同窗會」做為聚會基地，為了富岡導覽摎觀光發展來打拚，用辦理文化活動方式，活化伯公岡个傳統客家文化，民國111年(2022年)，成立「富岡故事館」，設置「鬧熱富岡」常態展覽，分凋零个慢生活社區，慢慢仔分人看著，佢生活摎歷史洗練个光華。因為係早期个鐵道肥料倉庫改建，裡背肚還做得看著壁頂項，留下个尺寸刻線，證明了當時个米倉榮景，也印證富岡鐵道倉庫，乘載了臺灣農業个發展脈絡。